ലോകസിനിമയുടെ നിഴലും വെളിചവും കലർന്ന സെല്ലുലോയ്ഡ്‌ ദൃശ്യങ്ങളിലേക്ക്‌ അനന്തപുരിയുടെ വാതിലുകൾ തുറന്നിട്ടുകഴിഞ്ഞു . 7000 ത്തിലധികംവരുന്ന ഡെലിഗേറ്റുകളുടെയും ലോകത്തിന്റെ നാനാഭാഗത്തു നിന്നുമെത്തിചേർന്ന സിനിമാപ്രവർത്തകരുടെയും പദചലനങ്ങളാവും ഇനിയുള്ള 7 ദിവസങ്ങളിൽ.സിനിമാവിസ്മയങ്ങളേക്കാളുപരി കാമ്പുള്ള സിനിമയെ സ്നേഹിക്കുന്നവരുടെ ഈ കൂട്ടായ്മ 14 വർഷം പിന്നിടുമ്പോൾ സംശയലേശമെന്യേ പറയാം, തിരുവനന്തപുരം രാജ്യാന്തര ചലച്ചിത്ര മേള ലോകോത്തരനിലവാരം പുലർത്തുന്നുവെന്ന്. സംഘാടകരുടെ പാളിച്ചകൾ ചർച്ചചെയ്യപെടാറുണ്ടെങ്കിലും നല്ലസിനിമകളുടെ കുത്തൊഴുക്കുണ്ടങ്കിൽ പ്രേക്ഷകമനസ്സിൽ പിന്നെ മറ്റൊന്നിനും സ്ഥാനമില്ല.
ഇന്നലെ വൈകിട്ട്‌ നിശാഗന്ധി നിറഞ്ഞുകവിഞ്ഞ പ്രേക്ഷരെ സാക്ഷിനിർത്തി 14 ദീപങ്ങൾ തെളിയിച്ചു കൊണ്ട്‌ ഇത്തവണത്തെ സിനിമാപൂരത്തിനു തുടക്കമായി.ചലച്ചിത്ര അക്കാഡമിയുടെ നേതൃത്വത്തിലുള്ള ഈ മേളയുടെ പുതുമയായി പ്രിയ ചലചിത്രകാരൻ മൃണാൾസെന്‌ സമഗ്ര സംഭാവനയ്ക്കുള്ള പുരസ്കാരം സമ്മാനിച്ചുകൊണ്ട്‌ തന്നെ തുടങ്ങാൻ കഴിഞ്ഞത്‌ എടുത്തുപറയേണ്ടതു തന്നെ. ഓസ്കാർ ജേതാവ്‌ റസൂൽ പൂക്കുട്ടി , ഷർമ്മിള ടാഗോർ, മധു, സിബി മലയിൽ തുടങ്ങിയ സിനിമാപ്രവർത്തകരും, കേന്ദ്ര മന്ത്രി ശശി തരൂർ, സംസ്ഥാന മന്ത്രിമാരായ എം.എ ബേബി, ബിനോയ്‌ വിശ്വം,ഫ്രഞ്ച്‌ അംബാസിഡർ, തിരുവനന്തപുരം മേയർ ജയൻ ബാബു തുടങ്ങിയവർ വേദിയിലും, അടൂർ ഗോപാലകൃഷ്ണൻ, തമിഴ്‌ സംവിധായകൻ ചേരൻ തുടങ്ങിയവരുൾപ്പെട്ട പ്രേക്ഷകരും ചേർന്ന ഉദ്ഘാടന ചടങ്ങിനു ശേഷം ബാംഗ്ലൂർ ആഷാങ്ക്‌ അവതരിപ്പിച്ച കലാവിരുന്നുമുണ്ടായി.
ഉദ്ഘാടന ചടങ്ങില്‍ നിന്നും ചില ചിത്രങ്ങള്‍
നിശാഗന്ധി നിറഞ്ഞുകവിഞ്ഞ പ്രേക്ഷകർ
14 ദീപങ്ങൾ തെളിയിച്ചുകൊണ്ട്‌ നടന്ന ഉദ്ഘാടന ചടങ്ങ്‌
മൃണാൾസെൻ, ഷർമ്മിള ടാഗോർ, മധു, റസൂൽ പൂക്കുട്ടി എന്നിവർ ചടങ്ങിൽ പ്രസംഗിക്കുന്നു
ടാഗോർ ചലചിത്ര രംഗത്തെ സമഗ്ര സംഭാവനയ്ക്കുള്ള പുരസ്കാരം ഏറ്റുവാങ്ങുന്ന മൃണാൾസെൻ
ഓസ്കാർ അവാർഡ്‌ ജേതാവ്‌ റസൂൽ പൂക്കുട്ടിയെ ആദരിക്കുന്നു
